أعزائي المدونيين...شكرا

شكرا لكل من كانت هذة االمدونة سببا في معرفتي به...متخافوش مش حنتحر..الموضوع كله أني حتوقف عن التدوين في هذة المدونه و حواصل التدوين بس من خلال مدونتي الاخري اللي أنا حاطط لينكها علي الجنب في هذة المدونه...و علي العموم دة عنوانها برضه حكتبة
http://strugglingmichealitoo.blogspot.com/

شكرا لكل واحد دخل هنا و طرح رأيه.. مستنيكوا هناك
يلا باااااااي...أشوفكم هناك

كمان تاج

يبدو أن عام 2007 سيكون عام التاج.. فأصبح من النادر الان أن تفتح مدونة عربية و لا تجد فيها تاج أو اتنين علي الاقل..في الاول أنا كنت شايفة فكرة لذيذة للتعارف بين المدونيين بس مع مرور الوقت الواحد بدأ يلاقي تاجات متنوعة اللي عملنينها بصراحة ناس ربنا يسامحها لانهم حاطيين أسئلة اما محرجة حبتين أو اما تخليك تلف حولين نفسك قبل اجابتها
المهم جالي تاج جميل من زميلة لبنانية عزيزة اسمها رات صاحبة هذة المدونة الجميلة
http://yalatifoltof.blogspot.com/
قلت لأ بقي المرة دي دة تاج لبناني و أنا بعز لبنان و أهلها كتيير
نبدأ التاج علي بركة الله
هل تسعد عندما يمرّر أحدهم لك تاجاً؟
في الاول اة لاني بحس اني جيت علي بال حد بس مع انتشار التاج بالطريقة العجيبة دة حسيت أن الموضوع دمة تقل لان كل كام يوم الواحد يتكعبل في تاج و معظمهم متشابهيين الي حد كبير
هل مقدار سعادتك أو شعورك أياً كان-عند تمرير التاج لك يختلف حسب المدوّن الذي يمرّر لك التاج؟
و لية بس الاحراج دة..بصوا هوا أنا من ساعة ما دخلت عالم التدوين و الواحد قابل ناس محترمة كتييير و دة اترجم علي أرض الواقع يوم الجمعة الماضي في البورصة لما تقابلت مع مجموعة من خيرة المدونيين..علي العموم أنا لسة حاعمل بوست علي الموضوع دة فمش حاحرقة من دلوقتي..علي العموم أنا بجد مجليش تاج لسة من مدون معرفوش فبالتالي مقدرش أجاوب علي السؤال دة بدقة
هل تستمتع عند إجابتك على أسئلة التاج؟
بصراحة بالرغم من اني بقول أن التاج دمة تقل الا أ ني لن أستطيع انكار شعوري بلذة الاجابة علي اسئلة التاج خاصا أن معظمها أسئلة لها بعد نفسي و أنا غاوي موضوع الاختبارات النفسية دة من زمان لاني شايف أنة بيساعد الواحد يطلع كتيير من اللي جواه
هل ترى للتاج أهمية حقيقية؟
بيعرفنا و يقربنا من بعض اكتر و كمان بيخلينا نحط ايدينا علي النقاط الايجابية و السلبية في الشخصية
..wow!!!!!!
هل فكرت في عمل تاج خاص لك من قبل؟
ممممم...طب و الله فكرة
هل تفضّل قراءة أجوبة التاج عند المدونين الآخرين أم لا تهتم سوي بالتدوينات الاخري فقط؟
أهتم جدا خاصة لو أنا عارف ان المدون دة شخصية لذيذة زي سمراء النيل او عمرو أحمد أو ياسمين أنا حرة وكمان لاني مغرم بتكوين صورة لشخصسات المدونيين في دماغي
عندما تردّ على التاج، ما الذي تراعيه أكثر: الصدق، الإفاضة في الشرح، الاختصار الذي يهدف إلى مجرّد ملو خانة دون توغّل في العمق،الإجابة الظريفة التي تزيد من شعبيتك التدوينية، محاولة الإجابة بطريقة تختلف فحسب عن كل من ردّ على التاج من قبل، ... التأكيد على صورة معيّنة تريد رسمها عن شخصيتك الافتراضية في ذهن قارئك، الهروب من أن يعرف أحدهم عنك معلومات حقيقية؟
الواحد بيحاول أن تكون الاجابة تلقائية علي قد ما يقدر اما بقي اللي بعد الاجابة كل واحد حيظن اية ..فكل واحد و ذوقة بقي
إلى من تحرص على تمرير التاج؟
لو حاعملها بقصد الرخامة يبقي اكيد حمررها لسمراء النيل الكابتن انجي و ياسمين أنا حرة لانهم يا حرام مهرييين تيجان و التيجان نازلة فوق روءسهن علي كل شكل و لون ..بس لو حمررة من غير رخامة يبقي أي واحد يقرا التاج و يعجبة يعملة علي طول في مدونتة..شوفتوا بقي الديموقراطية اللي بجد
هل تحرص على قراءة إجابات من تمرّر لهم التاج، و هل تغيرإجاباتهم شيئا في إدراكك لهم؟
طبعا...أمال أنا ممرة لية أصلا...بالتأكيد كلما أحسست بالصدق في الاجابة ازداد احترامي لصاحب المدونة
هل تلتزم حرفيّا بأسئلة التاج؟
بالتأكيد عشان المصداقية و عشان مزعلش صاحب التاج كمان
اختر عدداً من المدونين للإجابة على هذا التاج
اللي يحب يعمله و شايف أنة مش حيكون تقيل علي قلبة و مزهقش من موضوع التاج يتفضل يعمله..و اللي شبع تاجات بالهنا و الشفا و كفاية عليه
شكرا يا رات علي هذا التاج ...في انتظار تعليقك

اشتعال النيران....و السبب ايران؟

شوفتوا أخر نكتة في الزمان العجيب دة...الرئيس الايراني أحمدي نجاد يصر علي برنامجة النووي و المضي فية قدما..مش كدة و بس دة كمان طهران نجحت في انتاج طائرات مقاتلة بدون طيار قادرة علي تنفذ هجمات انتحارية بكفاءة عالية ضد البحرية الامريكية اذا ما هاجمتها...تفتكروا اية بقي يكون رد فعل الحكومات العربية علي موضوع زي دة...تتعاون مع ايران-تفكر تحذو حذوها و يشوفوا ازاي دولة زي ايران تقريبا ظروفها لا تختلف عن كثير من الدول العربية نجحت في انتاج طائرات بهذة الكفاءة لا تتوافر مثيلتها الا لدي الصهاينة و طبعا كلنا عارفين امريكا و دول أوروبا ازاي بيساعدهوم بمثل هذة الاسلحة...المهم أن الحكومات العربية كلها يا حرام ابدت قلقها و تخوفها من امتلاك ايران مثل هذة الاسلحة و لذلك فبادروا بالبدء في سباق للتسلح للحد من خطورة التسلح الايراني لدرجة أن دول الخليج داخلة صفقات سلاح بحوالي 60 مليار دولار لتنفيذ هذا الغرض...يا نهار اسود 60 مليار دولار و عشان مين عشان ايران...امال اسرائيل اللي عندها نووي عيني عينك من زمان محدش فتح بقة لية...و يا ريت محدش يقعد يقول أصل ايران دول شيعة و الحكومات العربية خايفة من الخطر الشيعي القادم من جهة ايران لاني مستحيل اصدق بأن الشيعة أخطر من اسرائيل..ممكن حد يوضحلي حقيقة اللي بيجري و يفنعني بأن اللي بيجري دة مش مهزلة جديدة تضاف للسجل العربي الحافل بالمهازل في كل المجالات...علي العموم أنا بفكر انسي في سوم من الايام أني درست سياسة و أن دة يكون البوست الاخير ليا في السياسة و ابطل أقرأ جرايد بالمرة حفاظا علي الربع اللي فاضلي

تاج

لاحظت في الفترة الاخيرة انتشار موضوع التاج بين الكثير من المدونيين و أنة عبارة عن أسئلة متشابهه في كل مدونة بيجيب عليها كل واحد في مدونتة فسألت عشان اعرق بالضبط اية موضوع التاج دة فجاني الجواب من هاني صاحب مدونة كراكيب
bikya.blogspot.com
و من عمورا صاحب مدونة اريدكي انثي
bikya.blogspot.com
فلقيت نفسي لازم أعمل تاج في مدونتي و أهو برضة حيساعد كل واحد فينا أنة يتعرف علي شخصية التاني عن قرب و لو أن كدة الفضايح حتكتر بس علي العموم ربنا يستر
المهم نبتدي بقي
اية اللي حيحصل لايميلك لما تموت ؟
أكيد مش حقدر أفتحة بس علي فكرة يخرب بيت موضوع التاج دة...تصدقوا أنا السؤال دة جة في بالي كتير قبل كدة بس الواحد كان نسية
اديت الباس وورد لحد قبل كده؟
أكيد لأ لان الواحد بيحب يحتفظ بمساحة خصوصية في حياتة بالرغم من أن الايميل أكيد مافيهوش اسرار عسكرية أو مخابراتية يتخاف منها بي أهي مسألة مبدأ الخصوصية
اسمك؟
مايكل بالرغم من أن معظم المدونييين بيقروة ميشيل و دة راجع لطريقة كتابتي للاسم...معلش أصلي بحب الفرنساوي و بكرة الانجليزي علما بأني كنت طول عمري مدرسة انجليزي...يا مثبت العقل
عمرك؟
حكمل 23 في اغسطس القادم و لو أني شايف ان عمر الانسان مش بالسنين اللي بيعشها و انما بحاجات تانية كتير
برجك؟
العذراء بس انا عمري مكنت مؤمن بموضوع الابراج دة علي الرغم من أني لقيت صفات كتير من بتاعت برج العذراء فيا بس برضة و لو
مجالك او مجال دراستك ؟
الشر برة و بعيد سياية و اقتصاد بس و اللة أنا مش حرامي و لا منافق و لا واطي و اللة علي ما أقولة شهيد بس بجد اتبسطت من دراستي و أتأكدت أننا بعيدين كل البعد عن كلمة سياسة بمعناها الحقيقي و أن اللي بجرا هنا حاجة تانية لا داعي لذكر اسمها
شخصيتك نوعها اية؟
و اللة لو أعرف حاقول علي طول بس كل اللي تعاملوا معايا احتاروا ..علي العموم الخلاصة أني بحب البساطة في كل حاجة
السفر بالنسبة لك؟
حلم جميل أتمني تحقيقة في يوم من الايام بالطريقة اللي بحلم بيها...الخلاصة أنا ماسفرتش بقالي كتير لاني زمان متبسطش أوي في السفر و لاني مش عاوز أعمل حاجة غير بالطريقة اللي عاوزها
المود بتاعك؟
علي حسب الظروف...يعني تقدر تقول ساعة تروح و ساعة تيجي
وقت فراغك بتعمل فيه اية؟
و اللة ما فية اكتر منة..بقعد ادور علي شغل في مواقع التوظيف لاني بحلم أني أشتغل لاني ببساطة خريج 2005..بعد كدة بقعد علي الانترنت و أفتحلي كدة كام موقع و أشوف أخبار المدونات اية..و طبعا لو فية دوري انجليزي علي اية ار تي يبقي خير و بركة
الاكلة المفضلة؟
المحاشي..ورق عنب و باذنجان..و البامية و البسلة و السمك...بس علي فكرة انا مش أكيل خالص
الصفات اللي خدتها من بابا؟
يمكن العصبية و اللة اعلم
الصفات اللي خدتها من ماما؟
التوتر
اكتر 6 حاجات بتكرهها؟
اني اشوف دموع طفل...التسلط...الكذب...الخيانة...اسرائيل و امريكا و بالذات الكلب بوش...الغباء و كلمة حظ
اكتر 6 حاجات بتحبها؟
الانسان المبتسم علي طول لان دة عملة نادرة..طفل بيلعب و مبسوط لان دة قمة البراءة في الدنيا..قطة صغيرة و موتي و سمي اني اشوف واحد زي البغل بيشوط قطة أو كلب في الشارع لاني بافهم علي طول أنة معقد...كرة القدم طبعا و خصوصا المباريات العالمية لان مفيهاش شد عصبي و الواحد بيتمتع بجد..الرياضة بصفة عامة بمعني اني تقريبا بعتكف في البيت لما بيكون فية دورة أوليمبية كل اربع سنين..لما بحس اني عملت حاجة ذات قيمة بمجهودي
الشغل بالنسبة لك؟
مثل البحث عن قارة اطلانطس المفقودة...مين عارف يمكن البتاع اللي اسمة الحظ دة يتعدل في يوم..يا رب
اية الكومبيوتر والانترنت بالنسبة لك؟
دنيا تانية و عالم سحري و تحس أنك في بلاد العجائب-مع الاعتذار لأليس-ممكن تشوف اي حاجة في اي حتة في العالم بضغطة زر بي منكرش اني بكون علي اخري لما الكمبيوتر بيتغابي و ما أكثر هذة الحوادث
و أحب أباصي التاج لكل من
سمر ومني
الزعيمة
ياسمين صاحبة مدونة أنا حرة
ياسمين صاحبة مدونة
amyasser.blogspot.com
و طبعا هاني صاحب مدونة كراكيب
و عمرو أحمد
ابن بهية

أيهما أسهل؟

الحب أم الجفاء
الغدر أم الوفاء
الذم أم الثناء
الغرل أم الرثاء
البقاء أم الفناء

من قناة السويس لعبارة السلام...راح المصري في خبر كان

في أهرام امبارح لقيت خبر صغير بس مهم بيقول أن فية مواطن مصري من أصل ألماني اسمة محمد عطية عقد العزم علي مقاضاةشركة قناة السويس اللي كانت ماسكة حفر قناة السويس زمان ليطالبها بدفع تعويضات لاسر العمال المصريين اللي كانوا بيشتغلوا بالسخرة في حفر القناة و عددهم كان حوالي 120 ألف عامل مات الكثير منهم أثناء الحفر و كنت سمعت أنا في مرة أن العدد اللي مات دة مش أقل من 50 ألف عامل مصري..المهم و الجزء الطريف في الخبر بيقول أن الشركة دة لا ترال قائمة الي الان و تمارس نشاطتها في الغاز و الكهرباء و البنوك و المياة مش بس كدة كمان لأ دة طلعت شركة بنت حلال مصفية و بتشارك في أعمال خيرية في مختلف دول العالم الا مصر و طلعوا كمان بيدفعوا تعويضات بالمليارات لبعض العائلات اللي تضررت من هذة الشركة في بعض مناطق العالم برغم عدم ثبوت الضرر بشكل قطعي...فلما بصيت لموضوع الخبر دة لقيت أن فعلا التاريخ بيعيد نفسة علي رأي عمو فوكوياما...هيا مش مهزلة قناة السويس دة بدأت في مصر زمان بسبب الخديوي سعيد اللي كان همة علي كرشة و طبق مكرونة معتبر من الخواجة ديليسبس خلاة يبيع مصر و الشعب المصري كلة و يوافق علي شروط الشركة الاجنبية الظالمة اللي كان أهم شروطها أن العمالة المصرية تشتغل بالسخرة و مايكونش فية أي الزام بالتعويض علي أي أضرار تقع علي العمال بما فيها حالات الوفاة و طبعا كانت النتيجة معروفة أن القناة أصبحت كرباج لجلد المصريين اللي علي رأي أمينة رزق في ناصر 56 دمهم جري في القنال قبل ما المياة تجري فيها..بمقارنة بسيطة بين هذة الحادثة و حادث زي عبارة السلام و قطر الصعيد و غيرهم لقيت أن الاختلاف أن الخديوي سعيد بقي أسمة مبارك و أن طبق المكرونة تحول لحسابات بالدولار و اليورو علي بنوك سويسرا و أن الشعب المصري لسة بيدفع التمن من دمة و كرامتة بدون أي تعويض علي أي نقطة دم و لا حتي مجرد مساءلة جلادية...طب أنا حسأل سؤال بريء أرجو التفكير فية مليا قبل الاجابة علية...يكونش الامريكان و الصهاينة بيعتبروا الدم المصري و العربي رخيص و مستباح في أي و قت طالما أن مافيش اللي يدافع عنة...شوفوا الصهاينة هدوا الدنيا علشان خاطر جنديين خدهم حسن نصر اللة و لما بيجوا يتبادلو أسري ممكن يسلموا مئات الاسري في مقابل بضعة من الصهاينة المأسوريين..طبعا دة غير التعويضات اللي شفطوا العالم بها علي حس هتلر و النازية
و نرجع نسأل نفسنا بعد كدة لية ماخدناش مليم واحد عن الطيارة اللي وقعهلنا الصهاينة اللي كان علي متنها المذيعة سلوي حجازي و لا أسرانا اللي اتدفنوا أحياء في سيناء 67و أكيد هوا دة اللي خلي مذابح زي دير ياسين و صبرا و شاتيلا وقانا1 و 2 و خان يونس و غيرهم يمروا بسلام و أمان....عذرا للاطالة بس أنا قلت أقول كل اللي في نفسي لان الكتابة ممكن تخفف عن الواحد حاجات كتير أوي

شخصية العام

كل عام و الجميع بخير و في اتم صحة و سعادة بمناسبة هوجة الاعياد اللي داخلة علينا و كل سنة و أنتي طيبة يا مصر و ربنا يكفيكي من شر الوطني و الاخوان و مكائد الامريكان..
علي غرار الاستفتائات اللي مالية الدنيا اليومين دول عن أفضل فيلم و أفضل لاعب كرة و أفضل مسلسل...الخ,قررت أن أفكر في اختيار شخصية العام علي مستوي مصر و علي مستوي الوطن العربي,فوجدت نفسي في حيرة من أمري لان الحال ما يسرش أبدا و لكني قررت في النهاية أن أمنح السيد حسن نصر اللة شخصية العام علي المستوي العربي ..يمكن علشان الوحيد اللي صمد في وش الصهاينة و اللس قدر يقول كلمة لأ اللي عمرنا ما سمعناها من أي واحد من الطراطير العرب..صحيح أنا اتضايقت لما عرفت موضوع المناوشات الاخيرة مع الحكومة اللبنانية لام الحكاية في لبنان مش طالبة أي فتن أو حروب أهلية بس معلش ربنا يهدي الجميع و يكون كلهم قلبهم علي لبنان يجد...
طب كدة خلصنا من شخصية العام علي مستوي عالمنا العربي,نيجي لمصر ,فلقيت الموضوع أصعب لاني مش لاقي شخصية محترمة يتفق عليها الجميع و يلتف حولها..فقط أجد الفساد رائحتة تزكم الانوف و من العبارة للسكة الحديد لعمر أفندي يا قلبي لا تحزن..أجد أيضا بلطجة النظام و الاخوان و لهذا قررت حجب هذا اللقب لعدم وجود مرشحين مؤهلين و لكلي تذكرت في اللحظة الاخيرة النادي الاهلي و انجازاتة الاخيرة و تشريفة لمصر علي المحفل الدولي و لهذا فقررت منح هذا اللقب لادارة هذا النادي المحترم و أيقنت في نفسي أن الادارة المحترمة متي توفرت في أي منظومة كان النجاح حليفها..
يا ريت اللي عندة أي مرشح تاني يقولي لاني لغاية دلوقتي أن مصر بحالها مافيهاش شخصية محترمة يمكن الاقتداء بها و كل عام وأنتم بخير